رسائل بنكهة سودانية
بسم الله الرحمن الرحيم
أدمنتك
وطن مليان محنة
رملة ونخيل وشواطي جنة
زفة عروس مزدانة حنة
دمعة غريب لبلاده حنه
كايس الأمان كايس المحنة
ــــــــــــــــــــــــــــــــــــــــــــــــــ ـــــــــــــــــــــــــ
أعاين ليك
ألاقي معاي مدن مشدودة لي شوفتك
تقاسم قلبي في ريدتك
ونتغالط
منو الأكتر بريد عينينك
منو الأدمن سماع صوتك
منو الشايل دوام صورتك
وأباري هواي
ألاقي الغلبة لي قلبي
عشان ريدك سكن جواي
ــــــــــــــــــــــــــــــــــــــــــــــــــ ــــــــــــــــــــــــــ
منو الزيك يحس بالناس
منو المتلك جميل حساس
ومشتاقة
أعاين فيك ألاقي خطاك معاي ديمة
وأشوف عينيك مع الغيمة
وأشيل ذكراك صفة وسيمة
يا أروع زول
قدر يكسر رتابة الكون
ويتحكر في الأعماق هوى وقيمة
ــــــــــــــــــــــــــــــــــــــــــــــــــ ــــــــــــــــــــــــــــ
اشتقت ليك
وكتبت ليك
قدر المسافة البينا والشوق والحنين
اشتقت ليك
راجي القدر يجمعني بيك
يطوي المسافات والسنين
عايش على أمل اللقاء
في دنيا ما بتعرف تلين
ــــــــــــــــــــــــــــــــــــــــــــــــــ ـــــــــــــــــــــــــ
انا يا مناى ...من غير أحس
الشوق يشيلنى يجيبنى ليك .....
واسرح اتوه فى حضرتك ....
اتملى فى نظرة عينيك
واكتم كلام جواى كتير
وارجع بدون ما احكى ليك ...
وألعن براى بعد لقاك ...
قلبى البريدك و بيشتهيك ....
ــــــــــــــــــــــــــــــــــــــــــــــــــ ــــــــــــــــــــــــــــ
ليه يا دنيا فراقا وليه بتفرقي الاحباب
مدام متاكده وعارفه انو نار الفرقه اصلو عذاب
ناس في الريده مسروره
وناس بالحسره مقتوله
وناس في الشاطئ تتلاقى
وناس للنظره مشتاقه
ــــــــــــــــــــــــــــــــــــــــــــــــــ ــــــــــــــــــــــــــــ
صباح خيرا يضوي عليك بشاشاتو
وحنين زولا يشيلك شوق يعطر بيك مساحاتو
صباح أمي وصباح دمي البتمرق من مضخاتو
صباح الخير شروق عمري وبداياتو
صبحت اليوم سمعتك في حسيس قلبي بتهتف من صباباتو
ــــــــــــــــــــــــــــــــــــــــــــــــــ ــــــــــــــــــــــــــ
ما بكتفي ...
لو شوقي ليك امتد علي طوال الدرب
وشربت من ريدك بحر
واشواقي ليك كبت مطر
واحساسي فات كل شئ
مابكتفي ..
لو قلت فيك كل الكلام
ودبيت معاني الريد هيام
وتميت دروب الريد مشي
..... مابكتفي ......
ــــــــــــــــــــــــــــــــــــــــــــــــــ ـــــــــــــــــــــــــــ
اجمل حروف بهديها ليك مزدانه في احلي القوافي....
شايلة فال الأمنيات ممزوجة بالفرح الخرافي ..
انشاالله عمر كلو تسعد ولحظة من الآهه مافي...
ــــــــــــــــــــــــــــــــــــــــــــــــــ ــــــــــــــــــــــــــ
بتمر علي نسمات دعاش بتشيل
سلامي و شوقي ليك تهديك
اشعار الوفاء
ترحل تجيك عز الصقيع
و تلاقي في قربك دفا
وانا لما قلبي اختار يعز
اختارك انت و اكتفى
ــــــــــــــــــــــــــــــــــــــــــــــــــ ــــــــــــــــــــــــــــ
قد تتباعد الخطى
ولكن يبقلى القلب بوصله
يقودنا دوما اللى من نعز
ــــــــــــــــــــــــــــــــــــــــــــــــــ ــــــــــــــــــــــــ
لي عودة تانية برسائل اخرى
ان شاء الله تعجبكم
غزوولــــــــــــــــــــة
|
العرض العادي
